ಬೆಂಗಳೂರು: ದೇಶೀಯ ಇವಿ ಕ್ಷೇತ್ರದಲ್ಲಿ ಹೊಸ ಸಂಚಲನ ಸೃಷ್ಟಿಸಲು ಭಾರತದ ತಂತ್ರಜ್ಞಾನ ಆಧಾರಿತ ಎಲೆಕ್ಟ್ರಿಕ್ ವಾಹನ ತಯಾರಕ ಸಂಸ್ಥೆ ‘ಅವೋರ್ ಎಲೆಕ್ಟ್ರಿಕ್’ (Avor Electric) ತನ್ನ ಬಹುನಿರೀಕ್ಷಿತ ‘ಅವೋರ್ ಇಎಕ್ಸ್’ (Avor EX) ಎಲೆಕ್ಟ್ರಿಕ್ ಮೋಟಾರ್ಸೈಕಲ್ ಅನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಿದೆ. ಸಮರ್ಥ್ ಇ-ಮೊಬಿಲಿಟಿ ಸಂಸ್ಥೆಯ ಭಾಗವಾಗಿರುವ ಈ ಕಂಪನಿಯು, ಪ್ರತಿಯೊಬ್ಬ ಭಾರತೀಯ ಸವಾರರ ಅಗತ್ಯತೆಗಳನ್ನು ಗಮನದಲ್ಲಿಟ್ಟುಕೊಂಡು ಈ ಇವಿ ಬೈಕ್ ಅನ್ನು ರೂಪಿಸಿದೆ. ಇದರ ಆರಂಭಿಕ ಎಕ್ಸ್-ಶೋರೂಮ್ ಬೆಲೆ ₹1,24,999 ಆಗಿದ್ದು, ಗ್ರಾಹಕರ ಅನುಕೂಲಕ್ಕಾಗಿ ಕಂಪನಿಯು ‘EX 1’, ‘EX 2’ ಮತ್ತು ಪ್ರೀಮಿಯಂ ‘EX 2S’ ಎಂಬ ಮೂರು ವಿಭಿನ್ನ ಆಕರ್ಷಕ ರೂಪಾಂತರಗಳಲ್ಲಿ ಇದನ್ನು ತಂದಿದೆ.
ಸ್ವದೇಶಿ ‘ಅವೋರ್ ಸೋರ್ಸ್’ ತಂತ್ರಜ್ಞಾನ ಹಾಗೂ ಪ್ರತ್ಯೇಕ ಇವಿ ಸರಣಿಗಾಗಿಯೇ ರೂಪಿಸಲಾದ ‘ಎವಿಆರ್’ (AVR) ವಾಹನ ಪ್ಲಾಟ್ಫಾರ್ಮ್ ಆಧಾರದಲ್ಲಿ ಈ ಬೈಕ್ ನಿರ್ಮಾಣಗೊಂಡಿದೆ. ಅಹಮದಾಬಾದ್ನಲ್ಲಿರುವ ಸಂಸ್ಥೆಯ ಆರ್ಅಂಡ್ಡಿ ಕೇಂದ್ರದಲ್ಲಿ ಕಳೆದ ಮೂರು ವರ್ಷಗಳ ಕಾಲ ಸುದೀರ್ಘ ಸಂಶೋಧನೆ ನಡೆಸಲಾಗಿದ್ದು, ಬ್ಯಾಟರಿ ಮ್ಯಾನೇಜ್ಮೆಂಟ್ ಸಿಸ್ಟಮ್ (BMS), ಮೋಟಾರ್ ಕಂಟ್ರೋಲರ್ ಮತ್ತು ಆಪರೇಟಿಂಗ್ ಸಿಸ್ಟಮ್ ಸೇರಿದಂತೆ ವಾಹನದ 9 ಪ್ರಮುಖ ವ್ಯವಸ್ಥೆಗಳನ್ನು ಸ್ವತಃ ಅಭಿವೃದ್ಧಿಪಡಿಸಲಾಗಿದೆ. ಈ ಯೋಜನೆಯಡಿ ಕಂಪನಿಯು ಸುಮಾರು 120ಕ್ಕೂ ಹೆಚ್ಚು ಬೌದ್ಧಿಕ ಆಸ್ತಿ (IP) ಹಕ್ಕುಗಳಿಗೆ ಅರ್ಜಿ ಸಲ್ಲಿಸುವ ಮೂಲಕ ತಂತ್ರಜ್ಞಾನ ಕ್ಷೇತ್ರದಲ್ಲಿ ಬಲವಾದ ಹೆಜ್ಜೆ ಇಟ್ಟಿದೆ.
ಬೈಕ್ನ ಕಾರ್ಯಕ್ಷಮತೆ ಹಾಗೂ ಸಾಮರ್ಥ್ಯದ ವಿಷಯಕ್ಕೆ ಬಂದರೆ, ಅವೋರ್ ಇಎಕ್ಸ್ ಗರಿಷ್ಠ 260 ಕಿ.ಮೀ ವರೆಗೆ ಐಡಿಸಿ (IDC) ಪ್ರಮಾಣೀಕೃತ ರೇಂಜ್ ನೀಡುವ ಸಾಮರ್ಥ್ಯ ಹೊಂದಿದೆ. ವೇರಿಯೆಂಟ್ಗೆ ಅನುಗುಣವಾಗಿ 7.5 kW ನಿಂದ 10.5 kW ವರೆಗೆ ಗರಿಷ್ಠ ಪವರ್ ಮತ್ತು 250 Nm ಪೀಕ್ ವೀಲ್ ಟಾರ್ಕ್ ನೀಡಲಿದ್ದು, ‘EX 2S’ ರೂಪಾಂತರವು ಗಂಟೆಗೆ 114 ಕಿ.ಮೀ ಗರಿಷ್ಠ ವೇಗವನ್ನು ತಲುಪಬಲ್ಲದು. ಇದಲ್ಲದೆ ದ್ವಿಚಕ್ರ ವಾಹನ ರಂಗದಲ್ಲೇ ಪ್ರಥಮ ಬಾರಿಗೆ ‘ಸಂಯೋಜಿತ ಮೋಟಾರ್ + ಸ್ವಿಂಗ್ಆರ್ಮ್ ಪವರ್ಟ್ರೇನ್’ (Drive Link Arm) ತಂತ್ರಜ್ಞಾನವನ್ನು ಬಳಸಲಾಗಿದ್ದು, ಇದು ವಾಹನದ ತೂಕದ ಸಮತೋಲನ, ಹ್ಯಾಂಡ್ಲಿಂಗ್ ಮತ್ತು ಚಾಲನಾ ಸ್ಥಿರತೆಯನ್ನು ಹೆಚ್ಚಿಸುತ್ತದೆ.
ಇವಿ ಖರೀದಿದಾರರಲ್ಲಿ ಕಾಡುವ ಚಾರ್ಜಿಂಗ್ ಆತಂಕಕ್ಕೆ ಪರಿಹಾರವಾಗಿ ಬೈಕ್ನಲ್ಲಿ 1500W ಆನ್ಬೋರ್ಡ್ ಫಾಸ್ಟ್ ಚಾರ್ಜರ್ ನೀಡಲಾಗಿದೆ. ಪ್ರತ್ಯೇಕ ಚಾರ್ಜಿಂಗ್ ನೆಟ್ವರ್ಕ್ ಹುಡುಕುವ ಅಗತ್ಯವಿಲ್ಲದೆ, ಮನೆಯಲ್ಲಿರುವ ಸಾಮಾನ್ಯ 5A ಅಥವಾ 15A ಸಾಕೆಟ್ಗೆ ನೇರವಾಗಿ ಪ್ಲಗ್ ಮಾಡಿ ಸುಲಭವಾಗಿ ಚಾರ್ಜ್ ಮಾಡಬಹುದು. ಕೇವಲ 2 ಗಂಟೆಗಳಲ್ಲಿ ಬ್ಯಾಟರಿಯನ್ನು ಶೇ. 20 ರಿಂದ ಶೇ. 80 ರಷ್ಟು ವೇಗವಾಗಿ ಚಾರ್ಜ್ ಮಾಡುವ ಸೌಲಭ್ಯವಿದ್ದು, ಸಂಪೂರ್ಣವಾಗಿ ಚಾರ್ಜ್ ಆಗಲು 4 ಗಂಟೆಗಳು ಬೇಕಾಗುತ್ತವೆ. ವಾಹನದ ಬ್ಯಾಟರಿ ಪ್ಯಾಕ್ ಅನ್ನು NATRAX ನಿಂದ ಅನುಮೋದಿಸಲಾಗಿದ್ದು, BMS ವ್ಯವಸ್ಥೆಯು iCAT ನಿಂದ ಪ್ರಮಾಣೀಕರಿಸಲ್ಪಟ್ಟಿದೆ.
ಸ್ಮಾರ್ಟ್ ವೈಶಿಷ್ಟ್ಯಗಳಿಗೆ ಆದ್ಯತೆ ನೀಡಿರುವ ಕಂಪನಿಯು, ಈ ವಾಹನದ ಕೇಂದ್ರಭಾಗದಲ್ಲಿ ‘ಅವೋರ್ ಸೆನ್ಸ್’ ಎಂಬ ಸ್ವಂತ ಆಪರೇಟಿಂಗ್ ಸಿಸ್ಟಮ್ ಅಳವಡಿಸಿದೆ. ಇದು AI-ಚಾಲಿತ ‘ಅವೋರ್ ಸೈನಾಪ್ಸ್’ ಮತ್ತು ‘AVA’ ತಂತ್ರಜ್ಞಾನದ ಜೊತೆಗೂಡಿ ಸವಾರರ ಪ್ರತಿಯೊಂದು ಪ್ರಯಾಣದ ವಿವರಗಳನ್ನು ಸ್ವಯಂಚಾಲಿತವಾಗಿ ದಾಖಲಿಸುತ್ತದೆ. ಇದರೊಂದಿಗೆ ಅತ್ಯುನ್ನತ ಪರ್ಫಾರ್ಮೆನ್ಸ್ಗಾಗಿ ‘ಅಪೆಕ್ಸ್’ ಮೋಡ್, ಪವರ್ ನಿಯಂತ್ರಣಕ್ಕೆ ‘ಸಿಫ್ಟ್’ ಮ್ಯಾನುಯಲ್ ಗೇರ್ ಮೋಡ್, ಅಡಾಪ್ಟಿವ್ ರೈಡರ್ ಸಿಸ್ಟಮ್ (ARS) ಮತ್ತು ಸುಲಭವಾಗಿ ಪಾರ್ಕಿಂಗ್ ಮಾಡಲು ‘PAM+ ಪಾರ್ಕ್ ಅಸಿಸ್ಟ್’ ಸೌಲಭ್ಯಗಳನ್ನು ಪರಿಚಯಿಸಲಾಗಿದೆ.
ಭಾರತದ ಕಠಿಣ ರಸ್ತೆ ಪರಿಸ್ಥಿತಿಗಳಿಗೆ ತಕ್ಕಂತೆ ಬೈಕ್ ಅನ್ನು ಸಿದ್ಧಪಡಿಸಲು ಮಾರುಕಟ್ಟೆಗೆ ತರುವ ಮುನ್ನ 1,00,000 ಕಿ.ಮೀಗೂ ಹೆಚ್ಚು ರಸ್ತೆ ಪರೀಕ್ಷೆ ಹಾಗೂ 2,500ಕ್ಕೂ ಹೆಚ್ಚು ಗಂಟೆಗಳ ಡೈನಮೊಮೀಟರ್ ಪರೀಕ್ಷೆಗಳನ್ನು ನಡೆಸಲಾಗಿದೆ. ಈ ವಾಹನವು ಕೇಂದ್ರ ಸರ್ಕಾರದ AIS 156 ಮತ್ತು AIS 038 ಅತ್ಯುನ್ನತ ಸುರಕ್ಷತಾ ಮಾನದಂಡಗಳ ಪ್ರಮಾಣೀಕರಣ ಪಡೆದುಕೊಂಡಿದೆ. ಗ್ರಾಹಕರಲ್ಲಿ ದೀರ್ಘಕಾಲಿಕ ನಂಬಿಕೆ ಮೂಡಿಸುವ ನಿಟ್ಟಿನಲ್ಲಿ ಕಂಪನಿಯು ಬೈಕ್ನ ಬ್ಯಾಟರಿ ಮೇಲೆ 5 ವರ್ಷ ಅಥವಾ 60,000 ಕಿ.ಮೀ ವರೆಗೆ ಸಂಪೂರ್ಣ ವಾರಂಟಿ ಒದಗಿಸುತ್ತಿದೆ.
ವಿನ್ಯಾಸ ಮತ್ತು ಬಣ್ಣಗಳ ವಿಚಾರದಲ್ಲೂ ‘ಅವೋರ್ ಇಎಕ್ಸ್’ ವಿಶಿಷ್ಟವಾಗಿದ್ದು, ಇವಿ ವಿಭಾಗದಲ್ಲೇ ಪ್ರಥಮ ಬಾರಿಗೆ ಪ್ರೀಮಿಯಂ ಡ್ಯುಯಲ್-ಟೋನ್ ಶೈಲಿಯನ್ನು ತಂದಿದೆ. ‘EX 2S’ ಮತ್ತು ‘EX 2’ ಆವೃತ್ತಿಗಳು ಸ್ಟಾರ್ಲಿಟ್ ಬ್ಲೂ, ಮೀಟಿಯಾರ್ ರೆಡ್ ಮತ್ತು ಸ್ಟೆಲ್ಲಾರ್ ಬ್ಲ್ಯಾಕ್ ಬಣ್ಣಗಳ ಡ್ಯುಯಲ್-ಟೋನ್ ಆಯ್ಕೆಯಲ್ಲಿ ಸಿಗಲಿದ್ದರೆ, ‘EX 1’ ಆವೃತ್ತಿಯು ಇದೇ ಬಣ್ಣಗಳಲ್ಲಿ ಸಿಂಗಲ್-ಟೋನ್ ರೂಪಾಂತರದಲ್ಲಿ ಲಭ್ಯವಿರಲಿದೆ. ಬೈಕ್ನ ಆರಾಮದಾಯಕ ಎರ್ಗೋ-ಫಿಟ್ ರೈಡಿಂಗ್ ವಿನ್ಯಾಸವು ದೈನಂದಿನ ಪ್ರಯಾಣ ಹಾಗೂ ದೀರ್ಘ ದೂರದ ಸವಾರಿಗೆ ಸೂಕ್ತವಾಗಿದೆ.
ಪ್ರಸ್ತುತ ಈ ಹೊಸ ಇವಿ ಬೈಕ್ನ ಅಧಿಕೃತ ಬುಕಿಂಗ್ಗಳು ಕಂಪನಿಯ ವೆಬ್ಸೈಟ್ನಲ್ಲಿ ತಕ್ಷಣದಿಂದಲೇ ಆರಂಭಗೊಂಡಿದ್ದು, ಗ್ರಾಹಕರು ಕೇವಲ ₹799 ಪಾವತಿಸಿ ಮುಂಗಡ ಕಾಯ್ದಿರಿಸಬಹುದು. ಬುಕಿಂಗ್ ಮಾಡಿದ 2 ತಿಂಗಳ ನಂತರ ವಾಹನ ವಿತರಣೆಗಳು (Deliveries) ಆರಂಭವಾಗಲಿದ್ದು, ಮುಂದಿನ ತಿಂಗಳಿನಿಂದ ದೇಶದ ಪ್ರಮುಖ ನಗರಗಳ ಶೋರೂಮ್ಗಳಲ್ಲಿ ಪ್ರದರ್ಶನಕ್ಕೆ ಸಿಗಲಿದೆ. “ಜಾಗತಿಕ ಮಟ್ಟದ ಸುರಕ್ಷತೆ ಮತ್ತು ಕಾರ್ಯಕ್ಷಮತೆಯನ್ನು ಭಾರತೀಯ ಗ್ರಾಹಕರಿಗೆ ಒದಗಿಸುವುದೇ ನಮ್ಮ ಮುಖ್ಯ ಗುರಿ” ಎಂದು ಸಂಸ್ಥೆಯ ಸಂಸ್ಥಾಪಕರಾದ ಪ್ರಿಯಾಂಕ್ ರಖೋಲಿಯಾ ತಿಳಿಸಿದ್ದಾರೆ.
