ಇಂಡಿಯಾ ಬುಕ್ ಆಫ್ ರೆಕಾರ್ಡ್ ಸೇರಿದ ಕೊಡಗಿನ ಪ್ರೇಕ್ಷಾ

ಇಂಡಿಯಾ ಬುಕ್ ಆಫ್ ರೆಕಾರ್ಡ್‌ನಲ್ಲಿ ಸ್ಥಾನ ಪಡೆದಿರುವ ಕೊಡಗು ಜಿಲ್ಲೆಯ ವಿರಳಾತಿ ವಿರಳರಲ್ಲಿ ಎಚ್.ಪ್ರೇಕ್ಷಾ ಸಹ ಒಬ್ಬಳು. ಸೋಮವಾರಪೇಟೆ ತಾಲ್ಲೂಕಿನ ಅಟ್ಟೂರುಕಟ್ಟೆ ಗ್ರಾಮದ ಗುತ್ತಿಗೆದಾರ ಹರೀಶ್ ಹಾಗೂ ಸಿಂಧು ಅವರ ಪುತ್ರಿಯಾದ ಎಚ್.ಪ್ರೇಕ್ಷಾ 4ನೇ ತರಗತಿ ವಿದ್ಯಾರ್ಥಿನಿ. ಈಕೆ ಈ ವಯಸ್ಸಿಗೆ ಇಂಡಿಯಾ ಬುಕ್ ಆಫ್ ರೆಕಾರ್ಡ್‌ನಲ್ಲಿ ಸ್ಥಾನ ಪಡೆದಿರುವುದು ವಿಶೇಷ.

ಮಹಾಭಾರತದಲ್ಲಿ ಬರುವ 101 ಕೌರವರ ಹೆಸರನ್ನು 54 ಸೆಕೆಂಡ್‌ನಲ್ಲಿ ಹೇಳುವ ಮೂಲಕ ಈ ವಿಷಯದಲ್ಲಿ ಈ ಹಿಂದೆ ಇದ್ದ ದಾಖಲೆಯನ್ನು ಮುರಿದಿದ್ದಾಳೆ. ಈ ಹಿಂದೆ ಕೇರಳದ ಬಾಲಕನೊಬ್ಬ ಇದೇ ಹೆಸರುಗಳನ್ನು ಹೇಳಲು ತೆಗೆದುಕೊಂಡಿದ್ದು 1 ನಿಮಿಷ 30 ಸೆಕೆಂಡ್‌ಗಳು. ಈಗ ಈ ದಾಖಲೆ ಪ್ರೇಕ್ಷಾ ಹೆಸರಿನಲ್ಲಿದೆ. ದುರ್ಯೋಧನ, ದುಶ್ಯಾಸನ, ದುಃಸಳ, ದುಃಶಳ, ಜಲಸಂಘ,ಸಮ, ಸಹ, ವಿಂದ, ಅನುವಿಂದ, ಸುಬಾಹು… ಹೀಗೆ ಕೊನೆಯಲ್ಲಿ ದುಃಶಿಲಾ ಹೆಸರನ್ನು ಹರಳು ಹುರಿದಂತೆ ಚಟಪಟನೆ ಹೇಳುವ ಈಕೆ ನೋಡುಗರನ್ನು ನಿಬ್ಬೆರಗುಗೊಳಿಸುತ್ತಾಳೆ.